LAOAG CITY – Agsagsagana ti Provincial Government of Ilocos Norte iti manamnama a pannakaisubli iti mabiit dagiti “international flights” iti Laoag International Airport wenno LIA.
Segun ken ni Gob. Matthew Marcos Manotoc a maibilang ditoy ti pannakapasayaat dagiti “tourist destinations” wenno dagiti lugar a maididiaya a pagturungan dagiti turista pakairamanan dagiti sumagmamano a proyekto infrastraktura.
Inbatadna a karaman ditoy ti manarimaan a pannakapapintas ti “Scenic View Deck” iti ili ti Solsona, “Camp Site” iti ili ti Nueva Era pakairamanan ti Currimao Tabacalera iti tulong ti Department of Public Works and Highways ken ti pannakaorganisar ken pannakaipasdek dagiti “Commercial Stalls” iti “Kapurpurawan Rock Formation.”
Kunana a narugian payen ti Phase II ti Tanap-Avis Falls Development ken sumarsaruno ti pannakapasayaat ti Paoay Lake ken ti Paoay Sand Dunes iti tulong ti TIEZA a mapundoan iti 180 a milyon a pisos.
Inlawlawagna nga iti nasapa a paset daytoy a tawen, pormalen a naiyawat iti lokal a gobierno iti ili ti Pagudpud ti Tourist Rest Area a kaunaan iti rehion uno ken proyekto manipud iti Deparment of Tourism.
Innayonna a kas iti inkarina iti immun-una a gundaway ket biagenna ti napintas a Paoay Golf Course pakairamanan ti Casino a kangrunaan a birbiruken dagiti turista.
