LAOAG CITY – Agsarsarak ti Provincial Government of Ilocos Norte kadagiti kampanya a mangestablisar ti renewable energy.
Segun ken ni Governor Matthew Marcos Manotoc, magutgotigot dagiti dadakkel a negosyo nga umay ditoy probinsia gapu ta maysa kadagiti kangrunaana damagen dagitoy sakbay nga agpatakderda ti negosyo ket ti nabababa a presyo ti kuryente.
Kinunana nga ikarkarigatanda ti mangkita ti wagas tapno adda dagiti renewable energy a mang-supply kadagiti dadakkel a negosyo a maipasdek ditoy probinsia.
Inapakaammona nga adda ordinansa a mangibaga a masapul a maipaay ti 15% a magenarate manipud iti renewable energy iti probinsia, manipud man iti baro a planta wenno kadagiti agdama nga agtartaray tapno mabenipisyaran dagiti umili.
Nupay adda 400 megawatt nga enerhia ti mapmapan iti Grid ket gatangen met laeng daytoy ti kooperatiba.
Inadmitir ti gobernador a saan pay a naan-anay a naiyimplementar ti nasao nga ordinansa gapu ta baro pay laeng daytoy.
Kabayatanna, kalikagom ti gobernador nga adda ti renewable power manufacture, renewable power data center ditoy probinsia ken pakairamanan ti agtultuloy a panag-expand dagitoy.
