LAOAG CITY – Ar-aramiden ti Provincial Government of Ilocos Norte ti amin a kabaelanna tapno awan ti mabaybay-an a sektor ditoy Ilocos Norte.
Mainaig iti daytoy, nangipaay iti kaunaan a gundaway ti gobierno probinsial babaen iti Metro Ilocos Norte Council wenno MINC ti tulong pinansial kadagiti kutsero ken “food delivery riders” ditoy probinsia.
Naipaayan ti tunggal maysa a benepisiario ti P2,500 ken foodpack ken dagiti kutsero ket adda ti nayon a bitamina ken pagpurga para kadagiti taraken dagitoy a kabalio manipud iti Provincial Veterinary Office.
Inbatadna a karaman kadagiti grupo dagiti delivery rider a nabenepisiaran ti Rapido, Inkaman, Grab, Food Panda ken Toktok.
Iti panangipaay ti mensahe ni Gov. Cecilia Araneta Marcos, inbatadna ti panagan-annad dagiti “food delivery riders” pakairamanan dagiti kutsero.
Kagiddan daytoy, inpadanonna ti panagyamanna iti serbisio nga ipapaay dagitoy kadagiti umili.
Ginutigotna dagitoy a mangipadanon iti aniaman a kalikagum wenno arungaing dagitoy para iti ad-adda pay a pannakapasayaat ti serbisio ti gobierno probinsial tapno matun-uyan ti kalikagumna a pannakaipaay kadagiti umili iti serbisio a mapagtalkan.
Kabayatanna, inpakaammo ni Mr. Dale Reantillo, Administrative Officer IV ti Metro Ilocos Norte Council nga umabot iti 144 dagiti “food delivery riders” a nakipagkameng iti opisinada idinto a 22 dagiti kutsero.
