LAOAG CITY – Kalikagum ti Provincial Government of Ilocos Norte a makagutigut pay ti ad-adu nga investors nga umay ditoy probinsia.
Daytoy ket kagiddan ti planoda a mangidiaya ti naruay a panggedan ken oportunidad para kadagiti umili.
Segun ken ni Mrs. Lizette Atuan, mangidadaulo ti Provincial Public Employment Service Office, saan nga agsarsardeng ti Gobernador a makisarsarita wenno mangal-allukoy kadagiti investor tapno mangipasdek dagitoy ti establishimento wenno negosio a mangipaay ti oportunidad kadagiti umili.
Mamati ni Atuan a manmano laeng dagiti mangayat nga agtrabaho iti ballasiw-taaw no laketdi adda ti panggedan a masarakanda ditoy probinsia.
Innayonna a gapu iti daytoy, kalikagumda a mangkita ti ad-adu a trabaho wenno oportunidad tapno saanen nga umadayo ken mapan iti ballasiw taaw dagiti kaprobinsiaan ken job-seeker ditoy probinsia.
