LOAAG CITY – Awan sarday ti panangkitkita ti Provincial Government of Ilocos Norte wenno PGIN babaen iti liderato ni Gob. Matthew Marcos Manotoc no kasano nga ad-adda pay a matulungan dagiti umili.
Nakikammayet ti gobierno probinsial babaen iti Provincial Social Welfare and Development Office kangrunaanna iti Persons With Disability Affairs Office iti “Audibly hearing aide center” ken ti “PBF Prosthesis and Brace Center” para iti pannakaipaay ti tulong kadagiti adda problema iti panagdengngegda ken dagiti adda diperensia dagiti sakada nga agkasapulan ti leg prosthesis.
Inlawlawag ni Mrs. Carolyn Domingo, Persons With Disability Affairs Officer nga adda ti sanga gasut sangapulo (110) a recipients ti “hearing aide” ken tallopulo (30) iti leg prosthesis.
Nupay kasta, inpalgakna a naipadalan dagitoy iti “free assessment”.
Inbatadna a naggapo dagitoy iti nagduduma a siudad ken munisipio ken inkiddawna pay kadagiti mayor ti panangipaayda ti nagluganan dagiti maseknan iti panagturongda iti centennial arena.
Inlawlawag ni Domingo a saan pay a masinunuo no asinno dagiti nakapasa kalpasan ti idadalanda iti hearing test ken no asinno ti mabalin a matulungan agsipud ta adda dagiti saan a mabalin a matulungan gapu ta saanen a makangngeg dagitoy.
Kunana a maammoan ti resulta daytoy kalpasan ti dua a lawas ken mismo a dagiti nadakamat nga ahensia ti mangbiruk ti pundo.
Manamnama a matulungan amin dagiti pimmasa iti “hearing test” pakairamanan dagiti tallopulo nga agkasapulan ti “leg prosthesis”.
Innayonna a bassit lang ti nairefer nga agkasapulan ti “leg prosthesis” gapu ta kalkalpas ti pannakairefer dagiti adda problema iti sakada iti sabali pay nga ahensia wenno NGO kas iti Rotary Club a nakatulungan ti sanga gasut a pasiente
