LAOAG CITY – Inrakurak ti gobyerno probinsyal ti panangaprobar na ti protocol ti Philippine Volleyball League a naadaptar manipud iti guidelines ti sports bubble nga inyestablisar ti gobyerno national.
Segun ti gobyerno probinsyal, kasapulan ti PVL kadagiti amin a makipaset ken personnel ti liga a maaddaan da ti negatibo a resulta ti RT-PCR test iti uneg ti 60 nga oras manipud iti idadalan da ti swab test kasta met ti negatibo nga antigen test iti isasangpet dagitoy.
Iti maikatlo nga aldaw da ditoy probinsya, dimmalan iti swab test dagiti amin a partisipantes idi ta naawat da ti resulta idi Sabado.
Maysa kadagiti miembro ti Perlas Spikers ti nagpositibo ken dagus a naisolate daytoy.
Inpakaammo ti gobyerno probinsyal a dagus a naiyuswat ti swift contact tracing kadagiti miembro ti Perlas Spikers ken insegida a naiquarantine iti tumunggal maysa.
Naiyiskedyul ti follow up RT-PCR test lima nga aldaw manipud iti naudi nga idadalan da ti swab test.
Innayon ti gobyerno probinsyal a ti PVL Bubble ket adayo a makaapektar manipud iti kumunidad ken awan ti exposure dagiti umili.
Agtultuloy ti panagtrabaho ti lokal a gobyerno ken ti liga tapno masigurado a ballaigi ken natalged ti pannakayuswat ti inaugural tournament ditoy probinsya.
