LAOAG CITY – Inpasigurado ni Gov. Cecilia Araneta Marcos nga aramiden ti amin a kabaelan ti Provincial Government of Ilocos Norte tapno maasistiran dagiti pasahero a naapektaran iti pannakakanselar dagiti night flight iti Laoag International Airport.
Segun kenkuana, adda ti pannakikoordinardan kadagiti maseknan nga ahensia tapno mapagtalinaed a natalged dagiti pasahero.
Inbatadna nga inasistiranda dagiti pasahero nga apektado tapno makakitada ti alternatibo a paglugananda a mapan idiay Manila ken dagiti umay ditoy probinsia.
Inlawlawagna a dagiti apektado a pasahero ket masapul nga ipakitada dagiti flight ticket-da wenno mangipaneknek a naka-booked-da ti flight-da.
Mainaig iti daytoy, mabalin a makikoordinar a direkta dagiti pasahero babaen ti panangtawagda iti MINC Office babaen ken ni Mr. Dale iti numero a 0926 223 0618.
Kabayatanna, ti probinsia ket ipaspasiguradoda iti publiko ti pannakaliklik ti kastoy a situasion isut gapuna nga ikarkarigatanda nga insigida a matarimaan ti runway edge light a naperdi a nangitunda ti pannakakanselar ti flight.
Maipalagip a nakanselar ti flight idi Enero 5 ken manamnama daytoy nga agsubli inton Enero 8 gapu iti pannakaperdi ti edge runway for RWY 01/19 iti Laoag International Airport.
