LAOAG CITY – Pursigido ti gobierno probinsial iti kalikagum a maipadur-as ti Cacao industry ditoy Ilocos Norte.
Segun ken ni Mr. Hashler Garalde, High Value Crops focal person ti Provincial Government of Ilocos Norte, daytoy ti kangrunaan a rason a nagatendarda ti National Cacao Congress a pakairamananda Atty. Pancho Jose, Ilocos Norte Agriculture and Fisheries Extension Center director ken ni Mrs. Elma Gabriel a mangidadaulo ti Micro Small and Medium Enterprise Office.
Inpalgakna a tarigagay ti gobernador a mapagbalin ti Ilocos Norte a Cacao Capital ditoy pagilian nangruna adda dagiti gundaway nga adda ti krisis ti Cacao iti intero a lubong.
Inbatadna a plano ni Gob. Marcos Manotoc a mapalawa dagiti pamulmulaan ti Cacao ditoy probinsia.
Mainaig iti daytoy, inbatad ni Garalde a mangbirbirukda ti lugar malaksid iti ili ti Adams ken Pagudpud a napintas a pagmulaan ti Cacao.
Inbunannagna nga adda ti eksperto idiay Davao iti Cacao nga inawisna nga umay ditoy probinsia ken manamnama a sumangpet iti masungad a lawas.
Inlawlawagna a kayat ti gobernador a mapaadu ti mula a Cacao ditoy probinsia gapu ta kalikagumna a maipagpannakkel ti Ilocos Norte nga agparpartuat ti “top grade” a tsokolate iti tulong dagiti Micro Small and Medium Enterprise Office ditoy Ilocos Norte.
Kinunana a nakikammayetda ken ni High Value Crops USec. Ching Caballero mainaig iti nadakamat a banag.
Iti agdama, maad-adal ti pannakaiyakar ti pundo manipud iti nasional para iti produksion ken pannakaipadur-as ti industria ti Cacao ken kape ditoy probinsia.
