LAOAG CITY – Kalikagum ti gobierno probinsial a makipagpinnirma iti Memorandum of Agreement iti Department of Transportation para iti development ti Laoag International Airport.
Segun ken ni Sangguniang Panlalawigan Member Atty. Saul Lazo, umabot iti P750-M ti available fund a nailatang para iti Calendar Year 2025 para iti expansion wenno pannakaipalawa ti nadakamat nga airport babaen iti General Appropriation Acts wenno GAA.
Mainaig iti daytoy, plano ti Department of Transportation a maiyakar ti P670-M para iti expansion ti runway, construction ti drainage ken dadduma pay a kasapulan para iti development ti Laoag International Airport.
Kabayatanna, inlawlawag ni Mr. Dale Reantillo, ti Metro Ilocos Norte Council nga addan ti immuna a nausar a pundo para iti nasao a proyekto ken manamnama a maiyakar pay ti nabati a pundo iti gobierno probinsial.
Daytoy ket kalpasan a sinaludsod ni Bokal RJ Fariñas no makaanay met laeng ti pundo.
Iti sabali a bangir, paset daytoy iti nabayagen a plano ti gobierno probinsial para iti international flight ken iti direkta nga HNL-LAO flight.
Gapu iti daytoy a proyekto, kasapulan iti nalawlawa a runway ken iti dakdakkel nga aircraft.
Patien ti gobierno probinsial a babaen iti daytoy a proyekto ket maitandudo ti turismo ken mapadur-as ti ekonomia iti probinsia.
