LAOAG CITY – Kalikagum ti gobierno probinsial ti Ilocos Norte babaen ti gobernador a mausar a naimbag ti pundo para iti mapaspasangasangan a Palarong Pambansa 2025.
Segun kenkuana, no adda laketdi mabulod a pasilidad ket isu ti mausar para iti maisayangkat nga ay-ayam dagiti atleta.
Inbatadna a dagiti magatang nga sports equipment ket masapol a mabalin latta a mausar dagitoy inton sumaruno pay nga sporting events.
Inlawlawagna a kasapulan nga ipangpangruna ti pagsayaatan dagiti atleta babaen ti panangipaay kadakuada ti komportable a pagiananda, napintas a playing venues, alisto a medical response ken nasustansia a taraon.
Kunana a kalikagum ti gobierno probinsial nga agbalin nga eco-friendly ti naindaklan a paay-ayam nangruna ket maibilang ti Ilocos Norte kas renewable enery capital.
Naammoan nga adda ti sumurok-kumurang 300 a milyon a pisos ti pundo a mausar para iti pannakaisayangkat ti Palarong Pambansa 2025.
Kabayatanna, gagem pay ti gobierno probinsial ti pannakaisubli manen ti direct flights ti Cebu-Laoag ken Davao-Laoag iti Laoag International Airport tapno ad-adda a makagutigot ti ad-adu pay a turista ken gangganaet a bumisita ditoy probinsia.
