LAOAG CITY – Manarimaan ti learning visit ti Provincial Government of Bohol ken ti Bohol Association of Non-Government Organizations wenno BANGON ditoy Ilocos Norte.
Segun ken ni Gov. Erico Aristotle Aumentado ti Bohol, nangrugi ti nasao nga aktibidad idi Marso 18 ken agngudo intono Marso 21.
Inlawlawagna a kangrunaan a pakaisentroan daytoy a panagbisitada ket adda pakainaigan ti “Advancing Sustainable Provincial Investment for Renewable Energy” wenno ASPIRE Project ti Bohol.
Basar iti surat ni Aumentado ken ni Gov. Cecilia Araneta Marcos iti immun-una a gundaway, bigbigbigenda ti balligi a naaramidan ti Provincial Government of Ilocos Norte iti pannakaiyestablisar ti “wind, solar” ken “hydro” renewable energy ditoy probinsia.
Mangnamnama ti gobernador a dakkel ti maitulong daytoy a panagbisita dagiti maseknan nga ahensia ti Bohol para iti panagballigi ti kalikagumda a panangipasdek iti ASPIRE Project.
Karaman kadagiti renewable energy facilities a binisita ti nasao a grupo ti solar, battery energy storage ken “hybrid system.”
Mamati ni Aumentado a babaen iti maadal dagiti immay bimmisita ditoy Ilocos Norte ket napintas ti mabukel dagitoy nga “Strategic Renewable Energy Roadmap” para iti pannakaipatungpal ti Bohol Renewable Energy Code a mangipasigurado iti panagballgi dagiti programa, proyekto ken investment iti renewable energy.
Innayonna a napanunutanda ti pannakabukel ti nasao a roadmap gapu ta annugutenda nga iti dumakdakkel nga enerhia a kasapulan ti Bohol ket saan a mabalin nga agsadag laeng dagitoy kadagiti “imported fuel” tapno maaddaan dagitoy ti mapangnamnamaan a suplay ti elektrisidad.
