LAOAG CITY – Agpinnirma iti Memorandum of Agreement iti nagbaetan ti Provincial Government of Ilocos Norte ken Ilocos Training and Regional Medical Center.
Segun ken ni Dr. Arlene Ragasa, Officer In Charge ti Gov. Roque B. Ablan Sr. Memorial Hospital, daytoy ket tapno libre ti registration fee dagiti nurse iti nasao a medical center iti dua a kurso a kasapulanda kas ti Basic Emergency and Trauma Nursing Care ken Critical Care Nursing Course.
Inbatadna a ti laeng magastosda ket ti accomodation, expenses and materials.
Inlawlawagna a dua pay laeng ti dimmalan iti nasao a training ket masapul ti adu gapu kadagiti pasilidad nga adda iti nasao nga ospital kas ti Medical Intensive Care Unit, Neonatal Intensive Care Unit, Pediatric ken Surgical.
Kunana nga adda ti innem a nakasagana a mapan ag-training ngem immunan a nakabayadda ti registration fee dagitoy sakbay pay ti Memorandum of Agreement.
Inpettengna a saanda a makapaggigiddan dagiti nurse a mapan ag-training gapu ta awan ti agbati iti ospital ngem masapul a dumalanda iti daytoy a kurso gapu ta 1:3 trauma nurse ti masapul iti ospital.
Innayonna a saan met a mabalin a dagiti nakapag-training a nurse ti mang-training kadagiti padada a nurse gapu ta mismo nga ospital ti papananda ken innem a lawas daytoy a panagsanay.
