LAOAG CITY – Inpakaammo ni Sangguniang Panlalawigan Member Atty. Saul Paulo Lazo ti Chairman ti Committee on Education a manarimaan ti pannakisarita ti Gobierno Probinsial kadagiti dadakkel nga internet service provider.
Segun kenkuana, daytoy ket tapno mapapintas ken mapasayaat pay ti maipadanon a serbisio kadagiti kakailian nangnangruna kadagiti kanayon nga agus-usar ti internet access connection kangrunaanna kadagiti pangopisinaan ken dagiti dumaldalan iti online class.
Inbatad ni Lazo a nupay in-inut ti pannakaipatungpalna ket adu metten ti naaramidan dagiti maseknan nga internet service provider.
Kunana a napapigsa ti signal ti internet iti sumagmamano a lugar gapu iti pannakaiyestablisar dagiti “disc” a mangipuruak ti signal.
Malaksid iti daytoy, mangnamnama ti bokal nga agtultuloy a maipababa ti pagbayad iti internet services.
Inlawlawagna nga addan dagiti pakpakauna nga addang para iti daytoy a banag kangrunaanna iti pannakaidiaya dagiti promo manipod kadagiti maseknan a kompania.
Kabayatanna, inannugotna a narigat a maipatungpal iti daytoy nga school year ti “face to face classes” a sistema ti edukasyon gapu pay laeng iti pangta ti COVID-19.
