LAOAG CITY – Mangala manen ti Provincial Government of Ilocos Norte ti agbalin nga iskolar iti Senior High School.
Daytoy ket kalpasan a naisardeng itay kallabes ti panagala ti gobierno probinsyal iti agbalin a benepisiario iti nasao nga scholarship program.
Inpakaammo ni Dr. Maria Deleilah Felipe Adriatico, mangidadaulo ti Provincial Education Office a gapu ta nagturpusen iti napalabas nga academic year dagiti amin nga iskolar ti gobierno probinsyal iti babaen ti nasao a programa ket siyam a gasut ket pito dagiti maala nga iskolar ita a semester.
Mainaig iti daytoy, inbunannagna a mannarimaan ti panangisaysayangkat dagitoy iti “qualifying exam” para iti nasao nga scholarship program.
Inlawlawagna a ti immuna a nagturunganda ket ti ili nga Adams ken Pagudpud ken sumarsaruno dagiti dadduma a Local Government Units.
Kabayatanna, inbatadna a rinugyanda metten ti nag-interview kadagiti interesado nga agbalin nga iskolar ti juris doctor.
Segun ken ni Adriatico, nupay sangapulo ket innem ti naituding a bilang dagiti iskolar ti gobierno probinsyal iti juris doctor, sangapulo ket maysa laeng ti maala agsipud ta adda pay ti nabatbati a lima nga agdama nga iskolar iti babaen daytoy a programa.
Innayonna a nalpasen a nainterview dagiti aplikante nga interesado a manggundaway iti nasao nga scholarship program nga agad-adal iti Mariano Marcos State University idinto a maisayangkat ti interview kadagiti agad-adal iti Northwestern University intono Oktubre trese.
