LAOAG CITY – Inlawlawag ni Dr. Norman Rabago, covid-19 consultant ditoy probinsya a ti PGIN Masterlisting of Eligible Population for COVID-19 vaccine a link ket isu ti pagrehistroan para iti panagpabakuna.
Daytoy ket para kadagiti saan a makaawat ti manual wenno ti face to face census.
Segun kenni Rabago, daytoy ket maysa laeng a wagas tapno mai-profile ti recipient ken maberipikar no eligible ti maysa a nagrehistro para iti bakuna.
Inbatad na a ti panagrehistro ket saan nga isu ti consent iti panagpabakuna gapo ta ti final consent ket masapol nga adda ti pirma ti maysa nga indibidwal ken maaramid laeng daytoy iti kaaldawan ti panagpabakuna.
Mainaig iti daytoy, kunana nga iti PGIN Masterlisting ken iti listaan ti DOH ket nasurok lima a ribo ti nakailista, ken agtultuloy pay ti panagrehistro.
Kabayatanna, kunana nga awan pay ti pinal a rakurak no adda ti sumangpet ditoy Ilocos Norte a Sinovac vaccine.
Nupay kasta, naiget latta ti panagsagana dagiti vaccinators ken dagiti vacination sites.
