LAOAG CITY – Nakasaganan dagiti aktibidad ti Provincial Government of Ilocos Norte para iti bulan ti Disiembre.
Segun ken ni Mr. Xaver Ruiz, Officer In Charge ti Ilocos Norte Tourism Office, maiyuswat ti lights show iti Paoay Church inton bigat, Disiembre 1 iti oras ti alas sais ti sardam agingga alas diyes ti rabii.
Inbatadna a ti pannakasilaw ti Paoay Church ket agngudon inton Enero 3, 2025.
Mainaig iti daytoy, mairubuat ti Mercato ni Nanay Ces a mabalin a paggatangan dagiti bisita wenno turista kabayatan ti panagbuya ti lights show.
Kunana a mapasilawan met ti giant Christmas tree iti sangoanan ti Kapitolio Probinsial inton Disiembre 6.
Kabayatanna, ginutigot ti Officer In Charge ti Ilocos Norte Tourism Office dagiti amin nga umili a makidanggayda iti pannakarambak ti paskua ditoy probinsia.
