LAOAG CITY – Nangipaay ti Provincial Government of Ilocos Norte ti tulong pinansial kadagiti nagserbi iti gobierno probinsial babaen iti Government Internship Program wenno GIP, Work Readiness Program wenno WRP ken iti Special Program for Employment of Students wenno SPES.
Indauluan a mismo ni Gov. Cecilia Araneta Marcos ti pannakaipaay ti nasao a tulong kadagiti 83 a nagserbi iti probinsia iti babaen ti Government Internship Program ken 18 a benepisiario ti Work Readiness Program pakairamanan dagiti benepisiario ti Special Program for Employment of Students a 96.
Inbatad ti gobernador a dagiti benepisiario iti Government Internship Program ket immawat ti lima ribu a pisos, innem a ribu a pisos kadagiti benepisiario ti Work Readiness Program idinto a pito ribu tallo gasut walopulo a pisos kadagiti benepisiario ti Special Program for Employment of Students.
Kagiddan daytoy, inpadanonna ti panagyamanna kadagiti maseknan iti panangipaayda ti serbisio iti gobierno probinsial.
Kabayatanna, inyawisna kadagiti nagbalin a benepisiario ti Government Internship Program ken Work Readiness Program ti panagaplikarda ti trabaho iti gobierno probinsial.
Kunana nga agkasapulan dagiti nagdumaduma a pangopisinaan ti Provincial Government of Ilocos Norte kas iti Human Resource Management Office, Provincial Budget Office, Provincial Accounting Office pakairamanan dagiti ospital ti probinsia kangrunaanna kadagiti nurse.
Ginutigotna dagitoy nga agtalinaed iti probinsia ken saanen a pumanaw a mapan agtrabaho iti sabali a lugar.
