LAOAG CITY – Dumanon iti walopulo (80) nga Information Officers manipod iti nagdumaduma a National Government Agencies (NGAs) ken Local Government Units (LGUs) ti Ilocos Norte ti nakipartisipar iti “Effective Government Communication and Public Information Training” ita nga aldaw Abril 19 iti Sola Hotel ditoy siudad ti Laoag.
Daytoy ket iti panangidaulo ti gobierno probinsial ti Ilocos Norte babaen iti Communication and Media Office (PGIN-CMO) iti pannakibinulig ti Philippine Information Agency (PIA)-Ilocos Norte.
Gagem ti nasao nga aktibidad a mapabileg dagiti equip information officers iti pannakaisuro kadakuada dagiti napapateg nga istratehia iti panagsurat ti damdamag, media relations, social media branding, ken editing.
Nagserbi ni Assistant Secretary Michel Kristian Ablan ti Department of Trade and Industry kas kangrunaan a nagsarita.
Iti panangipaayna ti mensahe, inbatadna a narigat ti trabaho dagiti government communicators gapu ta kaykayat ti kaaddoan a maammoan dagiti saan a nasayaat a damdamag.
Kunana nga ad-adda a dagiti dakes a damdamag ti makitkita imbes a dagiti napipintas a damdamag.
Nupay kasta, inlawlawagna a ti panglaban dagiti napipintas a damdamag manipud iti gobierno ket dagitoy to a damdamag ti mabasa ken maammoan dagiti sumarsaruno a henerasyon.
Ginutigotna dagiti partisipantes ti “Effective Government Communication and Public Information Training” training nga agipadamag a nasayaat ken inpalagipna kadagitoy a ti ar-aramiden dagitoy ket makapasayaat iti komunidad.
Aktibo a nakipartisipar dagiti partisipantes kadagiti “hands-on exercises,” naiyadal kadakuada ti epektibo a panagsurat ti damdamag pakairamanan dagiti public relations strategies a nangitunda iti pannakasursuroda kadagiti napapateg nga impormasion a mangpasayaat iti kalidad ti “government communications” ken “information dissemination” ditoy probinsia.
Kabayatanna, inpakaammo ni Mr. Gervy James Gumarit, mangidadaulo iti Provincial Communications and Media Office a dagiti nasursuro dagitoy iti nasao a training ket sumarsaruno laeng iti kangrunaan a gagemna a mangiyestablisar iti natibker a panagkaykaysa dagiti information officers.
Nagtalinaed ti kalikagum ni Gob. Matthew Marcos Manotoc a mangpasayaat iti komunikasyon ditoy probinsia a mangipasigurado a maaddaan dagiti Ilocano iti umiso nga inpormasion ken aktibo a partisipasion iti local governance.
Naitampok pay nga speakers iti daytoy nga aktibidadda Mr. Benjamin Pacris, dati a Philippine Information Agency – Ilocos Sur Information Center Manager; Mr. Edison Justin B. Deus, head writer ti Provincial Communications and Media Office; Ms. Emma Joyce Guillermo, Information Officer ti Philippine Information Agency – Ilocos Norte; ken ni Mr. Ryand Angelo Ugalde, Associate Editor for Broadcast ti Sirmata ti Mariano Marcos State University a nangilawlawag kadagiti padasna iti nagdumaduma nga aspeto ti komunikasyon ken public information.
