LAOAG CITY – Plano ti Provincial Government of Ilocos Norte ti mangala ti baro a Magnetic Resonance Imaging wenno MRI.
Daytoy ket kalpasan a kinumpirmaran ti Chairman ti Committee on Health a ni Dr. Medeldorf Gaoat a maysa a bulanen nga awan ti Magnetic Resonance Imaging kadagiti ospital ditoy probinsia pakairamanan ti Mariano Marcos Memorial Hospital and Medical Center iti siudad ti Batac.
Segun ken ni Gov. Cecilia Araneta Marcos, kasapulan ti 25 a milyon a pisos a gatad ti kuarta para iti pannakatarimaan daytoy.
Inbatadna a panpanunutenda no mangalada ti service contract wenno agkiddawda iti Department of Health.
Inpasingkedna a maisubli met laeng ti serbisio ti nasao a medical equipment ita a tawen gapu ta ammona a napateg daytoy para kadagiti ospital ken dagiti pasiente.
Inlawlawagna a nadadael ti Magnetic Resonance Imaging ti Mariano Marcos Memorial Hospital and Medical Center gapu iti fluctuating electrical current.
Innayonna nga adda ti seminar dagiti amin nga architect ken engineer iti ospital tapno ad-adda pay a maikkanda ti impormasion mainaig iti pannakausar ken pakaipanan daytoy.
Maipalagip a maalarma ni Bokal Rafael Medina iti kaawan ti Magnetic Resonance Imaging kadagiti ospital ditoy probinsia isut gapuna a kasapulan a mapan pay laeng dagiti pasiente idiay Ilocos Sur.
