Kinumpiskar ti China dagiti nakalap nga ikan dagiti mangalap a Pilipino ken sinukatanda daytoy ti expired a noodles.
Daytoy ti inlawlawag dagiti mangalap iti panagidadaulo ni Leonardo Cuaresma kalpasan ti joint hearing ti House committees on national defense ken iti West Philippine Sea iti maipagarup a “gentleman’s agreement” iti nagbaetan ti administrasion ni Presidente Rodrigo Duterte ken ti China, no sadinno a ti maipagarop a katulagan ti nanglapped iti Pilipinas iti panangtarimaan iti BRP Sierra Madre a naisanglad iti Ayungin Shoal tapno agserbi kas outpost iti West Philippine Sea.
Segun iti testimonia dagiti mangalap mainaig iti agresion ti China ken water cannon attacks kadagiti barko ti Pilipinas ti maysa kadagiti ebidensia nga insubmitir ti pagilyan idi naidarum ti China iti Permanent Court of Arbitration a nakabase idiay Hague idi 2014.
Gapu iti daytoy ket inpanamnama met ni Speaker Martin Romualdez ti tulong kadagiti mangngalap iti baet ti agresion dagiti Tsino.
Bayat nga inpetteng met ni Zambales Rep. Jeff Khonghun a nakasagana met ti militar a mangipaay iti tulong kadagiti mangngalap no mapasamak ti pangta ti China a mangibalud kadagiti trespassers.
Maipalagip nga adda ti immuna a pangta ti China nga arestaren da dagiti sibilyan nga agkalap iti Bajo de Masinloc, mangrugi inton Hunyo 15 a nangitunda ti panagbuteng dagiti mangalap a Pilipino.
