LAOAG CITY – Ngimmato iti maika-72 a puesto ti Philippine passport iti kabaroan a Henley Passport Index manipud iti maika-75 a puesto idi 2025.
Kapada ti Pilipinas ti ranggo ti Benin ken Uganda, ken adda visa-free wenno visa-on-arrival access iti 65 a destinasion dagiti Pilipino. Daytoy pay ti maika-7 a kapigsaan a passport iti Southeast Asia.
Agtalinaed met nga umuna ti Singapore kas addaan kapigsaan a passport iti intero a lubong, nga addaan ti access iti 192 a destinasion a saan a kasapulan ti visa wenno visa-on-arrival access.
Kasaruno ti Singapore iti Southeast Asia ti Malaysia a maika-7, Brunei a maika-19, Timor-Leste a maika-52, Thailand a maika-63, ken Indonesia maika-68. Bimmaba met ti ranggo ti Vietnam a nagbalin a maika-87, Cambodia a maika-88, Laos a nagbalin a maika-89, ken Myanmar a nagbalin a maika-91.
