LAOAG CITY – Balligi a naarestar babaen iti naisayangkat a buybust operation ti PNP Laoag ti maysa a pharmacist gapu iti panaglako na ti overpriced nga alcohol iti maysa a pharmacia iti barangay 23 ditoy siudad ti Laoag.
Nabigbig ti suspek a ni Lei Anne Santos y Valdez, agtawen 38, naasawaan, assistant pharmacist iti nasao a pharmacia ken residente iti Brgy. 12 ditoy siudad.
Naamoan a ni Dr. Glope Marie Monika de los Santos Laurin, agtawen 41, naasawan ken residente iti Brgy 15 ti agtagikua ti nasao a pharmacia.
Iti naiyuswat nga operasyon, adda ti pulis a nagpammarang a gumatang ti 500 ml nga isoprophyl alcohol ken agbalor ti 177 a pisos.
Ditoy a naamoan a nangina unay ti presyo ti lako nga alcohol ti suspek gapu ta 93 a pisos laeng ti suggested retail price ti nasao nga alcohol.
Nakumpiskar dagiti otoridad ti maysa a box a naglaon ti lima a 500 ml nga alcohol, 300 a pisos a nausar iti transaksyun ken order slip.
Gapu iti daytoy, manamnama a maipilaan ti reklamo a panaglabsing iti RA 7394 wenno consumer act of the Philippines ti suspek ken ti agtagikua ti pharmacia.
