LAOAG CITY – Inrakurak ti embahada ti Pilipinas iti Israel nga inserra da paylaeng ti opisina da nangrugi ita nga aldaw ken saan pay a masinunuo no kaano nga agsubli ti operasyon da gapu iti mapaspasamak a riribok iti nadakamat a pagilyan.
Immuna iti daytoy, inbilin ti embahada kadagiti Pilipino idiay Israel a tungpalen dagiti ibilbilin da tapno maiyadayo da iti peggad kabayatan ti panagatake nga ar-aramiden ti Palestinian Islamist group nga Hamas a nangitunda ti panangideklarar ni Israeli Prime Minister Benjamin Netanyahu ti “state of war alert”.
Iti maysa nga statement, binalakadan ti Philippine Embassy dagiti Overseas Filipino Workers nga agnanaed iti asideg ti Gaza Strip ken south Israel a suruten dagiti safety guidelines nga inparuk-at ti Home Front Command iti babaen ti maysa nga instructional video.
Maipalagip nga idi sabado ket nangiyuswat ti kadakkelan a panagatake ti hamas iti Israel.
Ita laeng nga aldaw ket nangipabanto dagiti militar ti
Israel kadagiti air strike iti Gaza, ken inbatad dagiti nakaimatang nga adda dagiti nadadagsen a panagbettak a nagresulta ti pannakatay ti sumagmamano nga indibidual.
