LAOAG CITY – Nangisayangkat manen ti Phil. Travel Agencies Association ti “familiarization tour” da ditoy Ilocos Norte.
Segun ken ni Mr. Xavier Ruiz ti Provincial Tourism Office, maysa a napintas a senyales ti panagsubli da.
Imbatadna a ti naudi nga iyummay ti nasao a grupo ditoy probinsia ket idi tawen 2013.
Kunana a dagitoy ti maysa kadagiti kaunaan nga asosasion a timmulong iti Ilocos Norte iti panangrugrugi ti probinsia a mangpasayaat iti benneg ti turismo sumagmamano a tawenen ti napalabas.
Inlawlawagna a ti panangisayangkat ti grupo ti “familiarization tour” ket kaipapananna a mangkitkita dagitoy iti sabali a destinasion malaksid kadagiti datin a pagturturungan dagiti turista nangnangruna ket temporario a napaserraan ti Boracay.
Impalgak ni Ruiz nga itantandudu ti gobierno nasional, ti Departamento ti Turismo ken dagiti pribado nga “stakeholders” ti Ilocos Norte a maysa kadagiti alternatibo a destinasion.
Inbunannagna nga iti panagsursursur ti grupo ket kitkitaenda no ana ti mabalinda nga ilako, no ana a “package” ti maidiayada.
Innayonna a karaman kadagiti nagturunganda dagiti datin a lugar a pagturturungan dagiti turista kas iti Pagudpud, Burgos, Paoay ken dadduma pay ken kiniddawda a mairaman ti La Milagrosa Cove ken ti Badoc Island idiay Badoc ken dagiti saan pay a nalatak a destinasion ditoy probinsia kas iti Dingras.
