LAOAG CITY – Dumanon iti P89.9 billion ti sobra a pondo ti Philippine Health Insurance Corporation manipud iti alokasion ti gobierno iti napalabas a tallo a tawen.
Daytoy ti kinompirmaran ni PhilHealth President ken Chief Executive Officer Emmanuel Ledesma Jr. iti House Committee on Appropriations.
Iti nadakamat a gatad, addaan ti P271 billion manipud 2021, P24 billion manipud 2022 ken P38.8 billion manipud 2023.
Inawagan dagiti agpanpanday-linteg ti “saan nga umiso a patta-patta” para iti kanayonan a pondo a kasapulan ti PhilHealth iti agdama ken indagadagda iti state health insurer a paaduenna dagiti benepisio wenno pababaenna ti premium contribution rates.
Segun kadagiti mammanday-linteg, awan ti sobra a pondo no umiso ti kalkulasion ti gobierno.
Inlawlawag ni dati Health secretary Francisco Duque a limitado ti suplay dagiti test kits ken nangato ti global demand bayat nga adda iti initial stages ti COVID pandemic ngem dagiti nadakamat a COVID test package ti PhilHealth ket nagtultuloy idinto a ngimmato ti suplay ti test kits.
Kabayatanna, idi kangitingitan ti pandemia ket simrek ti pagilyan iti loan agreement kadagiti foreign financial institutions a $2.21 billion nga addaan iti commitment fee a P162 million no sadinno inkeddeng ti gobierno a kanselaren ti katulagan para iti pautang nga aggatad iti $800 million.
