LAOAG CITY – Dinayaw ni Senator Christopher “Bong” Go, Chairperson ti Senate Committee on Health ti pannakaipalawa ti PhilHealth iti benepisio a sakupen iti rare diseases ken mobility devices babaen ti health-care packages daytoy.
Ti nasao a reporma ket manamnama a mangpalag-an iti pinansial a padagsen kadagiti naapektaran a pamilia ken mangipaay ti napinpintas nga access iti esensyal nga health services.
Inbatad ni Go a daytoy ket nabayagen ket nasken a kasapulanen dagiti naruay a Pilipino nga agdusdusa gapu iti kinakurang ti suporta kadagiti kasapulanda a medikal.
Karaman iti baro a “Z-Benefits Package for Rare Diseases” ti PhilHealth ti coverage iti sangapulo a naidumduma a genetic condition kas ti Maple Syrup Urine Disease, Gaucher Disease ken Osteogenesis Imperfecta ken dadduma pay.
Ti rate ti benepisio para kadagiti nasao a sakit a makaapektar iti mapattapatta a 443 a ribu a Pilipino ket manipud iti P99,000 agingga iti P739,000 a maysa a panagngato ti sumurok maysa a ribu a porsiento maidasig iti napalabas a coverage.
