LAOAG CITY – Inalay-ayan ti Department of Health (DOH) ti panagamak ti publiko iti magastos mainaig iti panagpaagas iti ospital para iti sakit a leptospirosis.
Segun iti Department of Health, kabaelan nga i-cover ti Philippine Health Insurance Corporation ti panagpaagas ti nasao a sakit uray iti pribado nga ospital.
Daytoy ket gapu ta adda ti sumagmamano nga indibidual nga agdudua a maikabil iti ospital kalpasan a nakitaan ti sintomas ti leptospirosis kas ti panaggurigor.
Segun ken ni Departmet of Health secretary Edwin Mercado, uray kadagiti private hospital a pakaikabilan ti pasyente ket kabaelan nga i-cover ti Philhealth gapu ta naipangaton iti 60 a ribo a pisos ti benefits package para iti moderate cases ti leptospirosis, idinto nga 400 a ribo a pisos ti severe leptospirosis.
Immunan nga inbatad ti Department of Health a nangato ti mortality rate no saan a maagasan a dagus ti leptospirosis.
