LAOAG CITY – Kampante ni Philippine Ambassador iti Estados Unidos a ni Jose Manuel Romualdez nga agtalinaed a natibker ti relasion ti America ken Pilipinas uray sinoman ti mabutosan a Presidente iti 2024 US Presidential elections.
Kinunana, awan ti dakkel a panagbalbaliw kadagiti polisia ti America no maipapan iti pannakilangenna iti pagilian.
Segun iti Philippine envoy, kinasaritana ti agpada a kampo dagiti dua a kandidato iti kinapresidente, a da dati a US Pres. Donald Trump ken US Vice Pres. Kamala Harris ken impasiguradoda nga agtalinaed a kas iti foreign policy ti America.
Inpetteng pay ni Romualdez a napateg para iti Pilipinas ti sumaruno nga American President ken ti foreign policy-na nangruna no maipapan iti economic ties.
No maipapan met iti isyu ti West Philippine Sea, patien na nga adda mutual interest ti America ken Pilipinas.
Nupay kasta, impaganetget ti opisial a napateg ti wayawaya kadagiti disputed water.
