LAOAG CITY – Nabayagen a mamonmonitor ti Philippine Army ti panagrec-recruit dagiti kameng ti New People’s Army iti rehiyon uno.
Daytoy ti inbatad ni Major Bryan Albano, ti pannakangiwat iti 501st Infantry Valiant Brigade.
Nupay kasta, kuna ni Albano a kumarkaron ti panagrecruit ti makattigid a grupo gapu ta us-usaren da payen ti online.
Inlawlawag na a ti kangrunaan a puntirya ti New People’s Army ket dagiti agtutubo gapu iti panagbalin dagitoy nga adventurism ken panaggagar da nga agserbi.
Gapu iti daytoy, nagpanawagan ni Major Albano kadagiti nagannak nga agridam ken bantayan a naimbag dagiti annak gapu ta ti ar-aramiden dagiti New People’s Army ket dadaelen da laeng ti biag ken masakbayan dagiti agtutubo.
Mainaig iti daytoy, inpakaammo ni Albano nga agtultuloy ti isaysayangkat da nga information educational campaign no sadinno nga agturturong da pay kadagiti pagadalan tapno makasarita ken maballaagan dagiti agad-adal a saan da nga aramiden ti sumurot kadagiti rebelde a grupo.
Kabayatanna, patien ni Major Albano a ti ar-aramiden dagiti kameng ti rebelde a panag-vlog ken saandan nga ilemlemmeng ti rupada iti publiko ket tapno al-alisto da a makarecruit kadagiti kayatna ti makikappeng iti grupo da.
