LAOAG CITY – Saan a mabalin nga agsardeng ti Philippine Coast Guard ken Armed Forces a Philippines a mangsalaknib iti karbengan ken teritorio ti Pilipinas.
Daytoy ti nagbalin a takder ni Commodore Jay Tristan Tarriela, ti spokesperson ti Philippine Coast Guard bayat ti agtultuloy nga aktibidad ti Chinese Coast Guard iti West Philippine Sea.
Kunana nga iti taaw ket saan met a kas iti kalsada a dagos a makapagpreno ti barko ngem ti inaramid ti China ket saan da a limik-lik no di ket inranta da pay a dinungpar ti barko ti Philippine Coast Guard.
Daytoy ket kalpasan a nagdinnungpar ti barko ti China Coast Guard ken Philippine Coast Guard.
Gapu iti daytoy ket mannarimaan ti panangideploy da kadagiti maibilang a best coast guard sailors tapno maawatan ti maipapan ti maritime geography iti West Philippine Sea.
Iti agdama ket adda naka-station a tallo a coast guard vessel, ti BRP Sandangan, BRP Cabra ken BRP Teresa Magbanua no sadinno a daytoy ti maysa kadagiti maibilang a kadakkelan a barko ti Philippine Coast Guard.
Iti met bilang dagiti personel, ket addaan ti pagilyan ti 9 nga akupado a maritime features iti West Philippine Sea, no sadinno a tallo ditoy partikular ti Kota, Ayungin, ken Rizal ket awanan ti presensya ti Philippine Coast Guard.
Bayat a ti innem ket akupado ti Philippine Coast Guard ken Armed Forces of the Philippines.
Segun ken Tarriela, saan na a maibaga no dagiti bilang ti personel a naideploy ket umdas tapno maibaga a mailisi da iti aniaman a risgo.
Inadmidtirna, a no pay narigat para kadagiti kameng ti Armed Forces of the Philippines nga iwayat ti resupply mission ket saan da nga agsardeng gapu ta mangnamnama dagiti mangalap a Pilipino kadakuada.
Inpetteng ni Tarriela a ti ububraen da ket saan a pulos nga aglabsing iti international law, no sadinno a sumursurot da kadagiti pagannurotan ti United Nations Convention of the Law of the Sea.
Kunana nga awan ububraen ti Philippine Coast Guard a madi, a kayat na a saw-en ket mabalin a ti China Coast Guard ti saan a makaawat iti international law.
Iti laksid dagiti aktibidad ti Chinese Coast Guard ket inpaganetgetna a menmentinaren laeng ti Philippine Coast Guard ti presensya da iti West Philippine Sea.
Kabayatanna, inrakurak ni Tarriella, a saan da nga agsardeng nga ilaban ti karbengan ti Pilipinas iti West Philippine Sea gapu ti ar-aramiden da ket para masakbayan dagiti sumaruno a henerasyon.
