LAOAG CITY – Inbutaktak ti Philippine Coast Guard a 13 a barko ti China ti karaman iti kaudian a panagharass na iti barko ti Pilipinas iti West Philippine Sea.
Daytoy ket adda ti pakainaigan na iti kaudian nga insidente ti pananglapped ken panangdungpar ti China Coast Guard iti resupply boat ti Pilipinas para iti BRP Sierra Madre.
Segun ken ni Philippine Coastguard Spokesperson for the West Philippine Sea Commodore Jay Tarriela, lima a barko ti China Coastguard ti karaman a nangiyuswat ti shadowing, dangerous maneuvers, ken blocking, idinto a walo a Chinese Maritime Militia vessels ti namonitor da a karaman a nanglapped iti resupply contingent ti Pilipinas.
Inrakurak ni Tarriela a rabii paylaeng sakbay ti kaaldawan a mismo ti resupply mission ti Armed Forces of the Philippines ken Philippine Coastguard ket addan ti namonitor da a Chinese Coastguard vessel nga umipos-ipos iti BRP Cabra, sakbay pay a nakadanun iti lugar ti Unaiza May 1 and 2.
Nupay kasta, idi rugyanen ti Philippine Coastguard ken Armed Forces of the Philippines ti misyon da ket ditoyen a rinugyan ti China dagiti narisgo nga addang da kontra kadagiti barko ti Pilipinas a gagem na a lapdan ti isaysayangkat da a resupply mission iti Ayungin shoal.
Iti baet nga awan ti nasaktan wenno nadangran ket nadadael ti sumagmamano a paset ti BRP Cabra manipod it panangdungpar dagiti barko ti China.
Immuna iti daytoy, kinumpirmaran ni Defense Secretary Gilberto Teodoro a nagpilan ti diplomatic protest ti gobyerno seknan iti kaudian a panaglabsing ti China Coast Guard iti paset ti West Philippine Sea no sadinno nga inpetteng pay ti opisyal a ti inaramid ti China ket nalawag a panagsalungasing iti International Law.
Maipalagip a naikkan ti Philippine Coastguard ti lima nga aldaw tapno ileppas da ti maritime investigation mainaig iti baro a panaglabsing ti China Coast Guard iti West Philippine Sea.
