LAOAG CITY – Nagpalagip ti Philippine Crop Insurance Corporation (PCIC) ditoy probinsya a masapol nga isapsapa a pa-insured dagiti taraken a baboy.
Segun kenni Mrs. Ma. Cristina García, ti mangidadaulo ti PCIC – Ilocos Norte, masapol a pa-insured dagiti taraken a baboy no addan ti 45 nga aldaw na manipod kadagiti lugar a saan pay nga apektado ti African Swine Fever (ASF) virus.
Inbaga na pay a saan koma a paspasig a native a baboy ti taraknen gapu ta saan da a ma-insured dagitoy gapu ta ti laeng awaten da ti aplikasyon na ket ti hybrid wenno crossbread.
Maipalagip a dagiti ili ken siudad nga addaan ti ASF virus a saan a mabalin nga agipasa ti aplikasyon na ket iti ili ti Burgos, Carasi, Sarrat, Vintar, Banna, Dingras, Marcos, Nueva Era, San Nicolas, Solsona, ditoy siudad iti Laoag ken Batac idinto a ti Piddig ket maberberipikar pay laeng.
Inpakaammo ni García a dagiti masapol para iti panagpa-insured ti baboy ket ti Application form manipod iti PCIC, Photocopy ti Valid ID ken RSBSA Stub, Certification aggapo iti Municipal Agriculturist a mangpaneknek a saan da pay a naapektaran ti ASF virus.
Innayunna a masapol nga adda pay ti isumitir dagiti mannalon wenno hog raisers a ladawan dagiti taraken da a pa-insured da.
Malaksid iti daytoy, masapol nga adda pay ti kopya ti ASF ordinance wenno Executive Order a mangidekdeklarar a ti ili wenno siudad ket ASF free.
