LAOAG CITY – Binallaagan ti Philippine Embassy idiay Russia dagiti amin a Pilipino nga agnanaed iti nasao a pagilian.
Daytoy ket kalpasan ti napasamak a panangraut dagiti grupo ti lallaki iti maysa a concert hall idiay Krasnogorsk idiay Russia.
Basar iti pannaki-uman ti Bombo Radyo Laoag ken ni Bombo International News Correspondent Regine Aguilar idiay Russia, adda ti inparuk-at a pakdaar ti embahada ti Pilipinas maipapan iti naiget pay laeng a panagruar ken panagturongda kadagiti dupudop a tattao.
Inbatadna nga umabot iti dua agingga lima nga indibudal a lallaki a naka-combat fatigues ti kellaat a nagpaputok babaen ti machine gun iti nasao a concert hall nga isu ti maibilang a kadakkelan a mall iti Moscow.
Nupay kasta, inlawlawagna nga awan ti naipadamag a nadangran wenno pimmusay a Pilipino iti nadakamat nga insidente.
Kabayatanna, kunana nga awan pay ti opisial nga inparuk-at a rakurak ni Russian President Vladimir Putin maipanggep iti nasao a panagraut iti nalatak a mall.
Immuna iti daytoy, saan a bumaba iti 40 a tattao ti natay kalpasan a rinaut dagiti lallaki iti concert hall iti Krasnogorsk idiay Russia no sadino adda pay ti nasurok 100 nga indibidual ti mapapati a na-trap iti uneg ti pasdek gapu ta mangrugi met daytoyen a mauram gubuay iti panagbettak.
