LAOAG CITY – Impakaammo ni PSMS Eric Bumagat, mangidadaulo ti Traffic Division ditoy ciudad ti Laoag nga adda da maideploy a kameng ti polisya iti nagduduma a paset ti kalsada iti ciudad tapnon masigurado ti naannayas a garaw ti trapiko iti kaaldawan ti Undas.
Segun ken ni Bumagat adda dagiti maserraan a paset ti kalsada inton bigat Nobiembre 1 tapnon ti kasta ket agtalinaed ti linak, urnos ken talna, pakairamanan a maliklikan ti nairot a trapiko bayat ti Undas 2023.
Innayon na a kalpasan ti Undas ket agtalinaed a maiyuswat ti regular checkpoint.
Binallaagan pay ni Bumagat ti publiko a maiparit ti agitugot ti nasanger a mainom ken natatadem nga alikamen kas iti kutsilyo ken buneng.
Immunan nga inpakaammo ni Bumagat nga adda naikkwa a barikada iti sumagmamano a paset ti kalsada iti ciudad ti Laoag ita nga aldaw gapu ta adda maisayangkat a parada iti oras ti alas sais.
Itay laeng saanen a napalubosan a dumalan dagiti lugan iti paset a pakaisayangkatan ti nasao a parada.
Kabayatanna, inpakaammo met ni PLT. COL Adrian Gayuchan, hepe ti Philippine National Police iti ciudad ti Batac a sisisaganan dagiti kameng ti polisya para iti Undas 2023.
Kinuna a malaksid kadagiti makapapatay nga armas ken ti arak ket maiparit pay ti agpatukar iti napigsa a iti bisinidad ti sementerio, pakairamanan ti pinagay-ayam ti playing cards.
Segun ken ni Gayuchan, mangrugi ti deployment dagiti kameng ti polis pakairamanan dagiti barangay officials inton agsapa no bigat.
Innayon na nga adda met partikular a pwesto dagiti agtagilako para iti naurnos a garaw ti UNDAS 2023. Kamaudiananna, binallaagan dagiti otoridad ti publiko nga agbalin nga alerto ken agannad tapnon ti kasta ket maliklikan ti aniaman a problema kasta pay a maliklikan ti disgrasia.
