LAOAG CITY – Makumikum dagiti kameng ti Philippine National Police nga agsursursur tapno agpatrolya ken agmonitor iti intero nga ili ti Piddig para iti Barangay ken Sang Kabataang Elections a maiyuswat intono bigat, Oktubre 30 ita a tawen.
Daytoy ti inbatad ni Police Capt. Rudy James Jacalne, ti chief of police iti ili ti Piddig.
Inpakaammo ni Jacalne a rugyan da payen ti agtiliw kadagiti residente a mapaneknekan da a nakainom ti arak.
Mainaig iti daytoy, kuna ni Jacalne nga arigna saan da pulos nga agsarsardeng gapu ta tunggal adda ti maidanun kadakuada a report mainaig iti maipagarop a vote-buying ken panagharharas ket insigida da a mapan iberipikar no adda ti kinapudno na dagitoy.
Kabayatanna, kinumpirmaran ni Jacalne nga addan ti maysa a napilaan da ti kaso ken naiyendorsar da payen it Commission on Elections gapu iti maipagarop a vote-buying.
Inpalgak na a ti suspek ket re-electionist a para barangay chairman iti Barangay San Antonio iti ili ti Piddig no sadinno nga adda dagiti naidatag kadakuada nga ebidensya kas ti polyetos nga adda ti 1,500 a pisos na ken ti video footage.
Innayon na a pursigido ti nagreklamo ken dagiti testigo a tumulong tapno maipursige ti kaso kontra iti suspek.