LAOAG CITY – Kinumpiskar dagiti kameng ti Philippine National Police iti ili ti San Nicolas ti maysa a botelya ti nasanger manipud iti maysa a lalaki a sumrek iti kamposanto iti nadakamat a lugar.
Segun kenni Police Staff Sergeat Remigio Tila iti Philippine National Police iti ili ti San Nicolas, nakita da daytoy bayat ti pananginspeksyon da kadagiti karga wenno itugot dagiti tattao iti uneg ti kamposanto.
Inbatad na a basar iti palawag ti lalaki ket iyatang da ti nasanger ngem saan da nga inpalubos gapo ta naiget a maiparit daytoy nangruna ket maysa a botelya daytoy.
Kunana nga inpaibati da ti nasao a botelya ti nasanger ken pinastrek da met laeng ti maseknan a lalaki.
Mainaig iti daytoy, inbatad ni Tila a naiget ti panaginspeksyon da kadagiti amin a sumrek tapno masigurado nga awan ti madi a mapasamak.
Inlawlawag na a kitaen da amin ti bag dagiti mapan iti kamposanto tapno masigurado da nga awan ti maipan iti uneg ti kamposanto a maiparit a banag kas iti patadem ken arak, ken dadduma pay.
Innayon na nga iti laksid nga adda da iti pagserkan a mapan iti kamposanto ket adda met dagiti kakadua da iti uneg nga agsursursor tapno mapagtalinaed ti linak, urnos ken talna.
