LAOAG CITY – Inlawlawag ni Police Captain Randy Damo, ti chief of police ti Philippine National Police iti ili ti Solsona nga awan ti kinapudno na nga adda ti agsibrong iti Barangay Manalpac iti nasao nga ili.
Segun kenni Damo, iti imbestigasyon da ket agsaludsod laeng kuma dagiti nakalugan iti truck iti balasitang no sadinno ti ayan ti pagtukaran da.
Nupay kasta, rumrumuar nga inpagarop ti balasitang a sabali ti gagem dagiti maseknan isut gapo na dagus a nataray gapo iti buteng na.
Inbatad ni Damo a kinita da met ti CCTV footage ken nadterminar da ti lugan dagiti maipagarop nga agsibrong ken nakasarita a mismo dagiti otoridad dagiti maseknan.
Kunana a ditoy a naamoan da nga agdamag laeng kuma dagitoy ti direksyon iti papanan da.
Kabayatanna, nagballaag met ni Damo iti publiko a masapol latta ti panagannad nangruna ita a panawen ti paskua gapo ta adda dagiti sumrek nga aggapo iti nagduduma a lugar.
