LAOAG CITY – Inpakaammo ni Philippine National Police (PNP) chief Police General Benjamin Acorda Jr. a kontrolado da ti sitwasyon kadagiti areas of concern ita nga eleksyon.
Segun kenni Acorda, nagtalinaed ti kapya ken urnos kadagiti lugar a kontrolado ti Commission of Elections (Comelec) kangrunaan ti Negros Oriental ken Libon, Albay.
Inbatad na a nakasagana ti pwersa ti Philippine national Police iti aniaman a pakaseknan iti seguridad, bayat nga adda dagiti napateg nga insidente a napaliiw iti daytoy nga eleksyon.
Agpapan maisursurat ti damag, umabot iti 169 a naipadamag nga insidente ti kinaranggas a mapapati a mainaig iti Barangay ken Sangguniang Kabataan Elections (BSKE), 31 laeng kadagitoy ti nakumpirmaan a mainaig iti eleksyon, idinto a 94 ti nakumpirmaran nga awan pakainaigan na.
Kabayatanna, adda pay 44 nga insidente a manarimaan pay laeng ti validation process.
Kadagiti 31 a nakumpirmaan nga insidente a konektado iti eleksion, kaaduan kadagitoy ket naireport idiay Bangsamoro nga addaan iti 12 a kaso, sinaruno ti Cordillera nga addaan iti lima, ken Northern Mindanao nga addaan iti uppat, tallo a kaso ti naireport iti Ilocos ken Eastern Visayas, dua a kaso iti Bicol Region ken Central Visayas ken maysa ti naireport a kaso idiay Zamboanga.
Mainaig iti daytoy, inbatad ni Acorda a nupay addan dagiti report a mapapati a mainaig iti eleksion, saan a dakkel ti epekto dagitoy a karit iti pakabuklan a seguridad ti Barangay ken Sangguniang kabataan Election.
