LAOAG CITY – Nangiwayat ti “shadowing” ti Philippine Navy vessel kadagiti dua a barko a panggubat ti China kalpasan a nakita a dimmalyasat iti teritorio ti Pilipinas iti Basilan Straight a paset ti Zamboanga Peninsula.
Segun ken ni Armed Forces of the Philippines Public Affairs Office Chief, Col. Xerxes Trinidad, gapu iti daytoy ket dagus nga in-deploy ti NavForWem ti BRP Domingo Deluana (PG905) tapno imonitor ti panagdalyasat ti dua a PLA Navy vessels.
Inbatad ni Trinidad a nangipaay ti maysa nga standard challenge ti Philippine Navy Vessel iti Chinese war ships.
Maysa kadagiti dua a barko ti Qi Jiquang (BN83) ti nagresponde ken dinakamatda a mangiwaywayatda laeng ti normal navigation manipod iti naudi a port of call idiay Dili, Timor Leste ken dagitoy ket agturungen idiay Dalian, China.
Basar iti report ti Armed Forces of the Philippines idi Hunio 6 a namonitor ti Naval Forces Western Mindanao ti presensia ti dua a PLA Navy vessels a maysa a training ship ken amphibious transport dock ti dimmalyasat iti Basilan Straight.
Inpasigurado ti Armed Forces of the Philippines nga agtalinaed ti naiget a panagbantayda kadagiti amin nga aktibidad iti uneg ti maritime zone ti pagilian ken nagkari ti agtultuloy a pannakaipay ti kinatalged ken seguridad iti kabaybayan a sakup ti Pilipinas.
Kabayatanna, itultuloyda pay ti panag-uphold iti international maritime laws kabayatan a mabanbantayan ti territorial integrity ti pagilian.
