LAOAG CITY – Inpasigurado ni Philippine Olympic Committee Chairman Richard Bachmann ti regular a pannakisarsarita iti Team Philippines nga adda idiay France kagiddan ti agtultuloy a training dagiti atleta.
Segun ken ni Bachmann, kadua ti komite ti embahada ti Pilipinas idiay France a mangkitkita ti kasasaad dagiti atleta ken dadduma pay a paset ti Philippine contingent.
Inlawlawagna a nakagastosen ti Pilipinas ti agingga iti P21 million a pundo para iti training camp, panagplete ken inisyal a nagastos ti gobierno tapno naan-anay a maisagana dagiti atleta ti pagilian iti kadakkelan a torneo iti intero a lubong.
Inbatadna nga iti agdama, umdas ti pundo para iti nasao a torneo iti babaen metten ti panagtitinnulong dagiti ahensia ti gobierno, dagiti Senador ken dadduma pay nga opisial ti pagilian.
Inpasingked ni Bachmann a banbantayanda ti kasasaad ti Team Philippines tapno maipasigurado nga adda iti natalged a situasion ken salun-at dagitoy.
Kabayatanna, manamnama nga agbiahe inton Hulio 22 nga agturong idiay France ni Bachmann tapno mismo a makitana ti situasion ti Team Philippines a sumagmamano nga aldaw met nga agtalinaed iti nasao a pagilian.
