LAOAG CITY – Nagyaman ni Philippine Olympic Committee (POC) President Abraham “Bambol” Tolentino ken ni Presidente Ferdinand Marcos Jr. gapu iti panangsaludarna kadagiti atleta ti pagilian a makipaset iti Paris Olympics.
Inbatad ni Tolentino nga ita laeng nga adda ti maysa a Presidente ti pagilian a nairaman iti State of the Nation Address ti panangbigbig kadagiti atleta ti pagilian.
Maipalagip nga adda ti pakabuklan a 22 a Pinoy athlete ti makipaset iti Olympics manipud idi Hulio 26 agingga inton Agosto 11 idinto nga innem ti kualipikado iti Paralympics a mangrugi inton Agosto 28 agingga inton Setiembre 8.
Kabayatanna, daytoy ti maika-100 a tawen a makipaset ti Pilipinas iti Olympics.
Iti State of the Nation Address ni Pres. Marcos ket binigbigna dagiti lugar no sadinno pakaisaysayangkatan ti Palarong Pambansa nga isu ti mangas-asa kadagiti atleta ti pagilian.
