LAOAG CITY – Gutgutigoten ti Philippine Red Cross ti publiko a makipagpaset iti programa a Dugong Bombo: A Little Pain a Life to gain a maiyuswat inton Nobiembre 18, 2023.
Inpakaammo ni Ms. Nicole Jacinto iti Philippine Red Cross-Ilocos Norte dagiti nagduduma a benepisio iti pinagdonar iti dara.
Kunana a babaen iti panagidonar ti dara ket i-stimulate na ti pannakabaro ti cells wenno ti hange oil mechanisms, no agidonar ti dara iti kada tallo bulan ket mapabaro ti white blood cells, red blood cells , ken platelets, mapatibker ti kompiyansa iti bagi gapu ta dagiti blood donors ket maawawagan kas modern heroes.
Maipaay pay kadagiti amin a mangayat nga agidonar ti dara iti libre nga eksaminasyon, no sadinno a maamwan ti blood type ken haemoglobin level ti maysa a tao.
Malaksid kadagitoy, maipaayan dagiti successful blood donor iti blood donor card, no sadinno a maiprayoridad dagitoy a makaala ti dara nu agkasapulan da wenno ti kameng tipamilya da.
Mainaig iti daytoy, inlawlawag met ni Ms. Trixie Ablan a karaman kadagiti kwalipikasyon ti panagidonar iti dara ket masapol nga agtawen ti 16 agingga 65, ken no no menor de edad ket masapol ti pammalubos dagiti nagannak kenkuana; agdagsen ti 50 a kilo agpangato, addaan ti systolic blood pressure (BP) a 90 to 140 millimeters ken diastolic a 60 to 90 millimeters; pulse rate a saan a nababbaba ngem 50 agingga 100 iti kada minuto; masapol a normal ti temperatura ti bagi; haemoglobin level a 125 milligrams per liter; ken masapol a nakaturog iti walo nga oras sakbay nga agidonar ti dara.
Inlawlawag na pay a kadagiti aggurigor ket temporaryo a saan a mabalin nga agidonar, idinto a kadagiti met adda ti maintenance ket saan a mabalinen nga agdonar iti dara no ti maintenance medicine da ket beta blockers, ngem kadagiti agtumtumar ti agas tapno laeng makontrol ti blood pressure ket mabalin a mairefer iti Physician on duty wenno masapol ti pammalubos iti doktor da.
Maipalagip a ti Philippie Red Cross – Ilocos Norte Chapter ket addaan kadagiti aktibidad, kangrunaan ti Health Caravan maysa a medical mission no sadinno nga mangipaay da ti libre a serbisyo, pakairamanan ti libre a check-up, libre a medicina, ken libre a reading glasses kadagiti residente ditoy probinsya. Kabayatanna, ginutigot da dagiti kayat na ti makibinnulig kangrunaan ti panagidonar iti dara nga agturong laeng iti opisina ti Red Cross iti Brgy. 23 Laoag City silulukat da manipod alas otso ti bigat agingga alas kuatro ti malem, masapol laeng a mangitugot ti Identification Card.
