LAOAG CITY – Nakasagana ti Philippine Red Cross – Ilocos Norte Chapter a makikinnamayet iti siasinno man a grupo a kalikagumna a mangiwayat kadagiti volunteer works and activities ditoy probinsia.
Daytoy ti inpakaammo ni Ms. Edna Orcino, Chapter Administrator ti Philippine Red Cross – Ilocos Norte.
Inbatadna, a dagiti agkiddaw ti tulong iti opisinada a mangipaay ti serbisio iti publiko ket mabalin laeng a mangipatulod ti surat iti opisinada nga adda ti nakailanad nga aldaw ken lugar a plano a pakaiwayatan ti ania man a serbisio.
Kabayatanna, silulukat ti opisinada nangruna iti pannakaiwayat ti blood letting project gapu ta babaen iti daytoy nga aktibidad ket matulongan ti probinsia iti pannakaipangato ken adda ti naan-anay a suplay ti dara kadagiti sumarsaruno nga aldaw.
