LAOAG CITY – Maalarma ni Philippine Red Cross Chairman ken Chief Executive Officer Richard Gordon iti panagkurkurang dagiti doktor iti pagilyan.
Iti panagbitla ni Gordon iti Donor Appreciation Ceremony ti University of the Philippines (UP) College of Medicine (UPCM), inbatad na a kasapulan ti naan-anay nga inklusibo ken accessible a medical education.
Inpetteng ni Gordon nga inaldaw nga ad-ado dagiti Pilipino a doktor ken nurse ti agbirbiruk ti napinpintas nga oportunidad iti sabali a pagilyan.
Segun iti Department of Health (DOH), ti pagilyan ket kasapulan na ti aguray ti sumurok-kumurang a 12 a tawen tapno mapunoan ti panagkurkurang ti nurses ken 23 a tawen para kadagiti doktor.
Inpaganetget manen ni Gordon a ti Philippine Red Cross ket agbirbiruk kadagiti wagas tapno matulungan ti pagilyan a masolusyonan ti maysa kadagiti kangrunaan a problema iti healthcare.
Maipalagip nga idi 2022, ti Philippine Red Cross ket nangipaay ti sibubukel nga scholarship iti 12 a medical students ti University of the Philippines (UP) College of Medicine, no sadinno a masakupan na ditoy ti matrikula, allowance iti panagbiag, allowance iti transportasyon, ken dadduma a kasapulan da para iti nasao a programa.
Nakatutuk ti Philippine Red Cross a tumulong iti pagilyan nga ilungalong ti sistema ti public health gapu ta kasapulan met ti organisasyon ti ad-ado a medical personnel kadagiti humanitarian responses na.
