LAOAG CITY – Nangrugin ti kadakkelan a Balikatan joint military exercises 2024 iti nagbaetan ti Armed Forces of the Philippines ken United States military.
Inpasingked ni Philippine National Police-Special Action Force Director Police Major General Bernard Banac a nakasaganan a sumabak iti Balikatan Exercises dagiti nasurok a 150 Special Action Force a troopers.
Isayangkat ti 39th Balikatan wenno bilateral training exercises iti nagbaetan ti Pilipinas ken Amerika manipod iti Abril 22 agingga Mayo 10 iti Northern Luzon ken Palawan.
Ti panagsanay ket napintas a gundaway tapno agobserbar ken makaala ti kapadasan kadagiti operasion iti baybay, tangatang, daga, command control ken cybersecurity.
Immunan a nagpakita ti kinasirib dagiti Special Action Force troopers ti pagilian iti naisayangkat a Basic Airborne Course Class 57-2024 iti Fort Sto. Domingo, Sta. Rosa City, Laguna idi Abril 11, sumagmamano nga aldaw sakbay ti pormal a panangrugi ti Balikatan 2024.
Inbatad ni Banac a kas rapid-deployment Force ti Philippine National Police, napateg ti partisipasion ti Special Action Force kadagiti panagsanay kas ti Balikatan tapno maasa ti panagsaganada iti internal security operations, counter terrorism ken humanitarian activities.
Agbalin pay daytoy a gundaway tapno dayawen ti panagsanay ti Special Action Force iti rapid deployment ken “precision operations.”
Kabayatanna, dumanon iti 16 a ribu a Philippines ken United States troops ti makipaset iti war games.
