LAOAG CITY – Kiniddaw ti Philippine Rice Research Institute (PhilRice) kadagiti mannalon nga usarenda ti teknolohia ti drone tapno mapaadu ken bumaba ti magastos iti produksion.
Maigiddan iti daytoy iti pannakairuar ti ahensia iti proyekto a “Drones4Rice” a panggepna ti mangaramid iti standard protocol para iti pannakausar ti drone technology para iti panagmula iti bukel, abono, ken pesticides, iti panagpataud iti pagay iti pagilian.
Segun ken ni Dr. Jasper Tallada, ti panagusar kadagiti drone iti panagtalon iti pagay ket mabalin a mangbalbaliw iti produksionda.
Napaliiw ti opisial a naparpartak ken nalaklaka ti agmula wenno mangikabil kadagiti abono ken pesticides, nga agusar kadagiti drone no sadinno basbassit ti magastos.
Segun ken ni Tallada, posible a bumassit ti gastos ti panagtrabaho agingga iti 50% idinto a 20 a minuto laeng ti panagmula iti maysa nga ektaria a pagay no idasig iti kagudua nga aldaw wenno naan-anay nga aldaw babaen ti panangusar iti tradisional a panagmula.
Kabayatanna, ti proyekto a Drones4Rice ket maysa a proyekto ti Department of Agriculture-Bureau of Agricultural Research ken manamnama a saan laeng a makaipaay iti benepisio iti ekonomia kadagiti mannalon no di ket mangparegta pay kadagiti agtutubo a sumrek iti panagtalon.
