LAOAG CITY – Kalikagum ti Provincial Health Office a maipaayan ti Anti-Flu vaccine ti amin nga empleado ti Provincial Government ti Ilocos Norte.
Daytoy ti inpakaamo ni Dr. Rickson Balalio, mangidadaulo ti nadakamat a pagopisinaan, kageddan iti manarimaan a panangiplastarda ti proposed budget iti opisinada para iti tawen 2025.
Inbatadna a daytoy ti kangrunaan nga iyalokaranda ti pondo inton umay a tawen, patien ni Balalio gapu a ti pannakaipaay ti Anti-Flu vaccine ket makatulong tapno agbalin a natalged ken nasalun-at dagiti empleado ti gobierno probinsial.
Kinunana nga iti agdama ket sumagmamano laeng kadagiti empleado ti Provincial Government ti Ilocos Norte ti maipapaayan ti bakuna gapu iti limitado a pondo ken mangnamnamada laeng kadagiti mabatbati a bakuna manipud iti Department of Health.
Kabayatanna, babaen iti daytoy nga addang ket maipasigurado nga amin nga empleado iti gobierno probinsial ditoy probinsia ket mabakunaan ken manamnama a maaprobaran.
