LAOAG CITY – Nagpalagip manen iti publiko ni Dr. Rickson Balalio, ti mangidadaulo iti Provincial Health Office iti kapitolyo probinsyal a liklikan ti agusar ti aniaman ti klase na a paputok kangrunaan na iti panangsarabo ti baro a tawen.
Kuna ni Balalio nga ado dagiti mabalin a pangparnuay ti ringgor iti panangsarabo ti baro a tawen.
Nagballaag pay ni Balalio kadagiti indibidual nga addaan ti impluwensya ti arak a liklikan ti agpaputok gapu ta dagitoy ti dakdakkel ti risgo na a madisgrasya.
Kabayatanna, kinumpirmaran ni Balalio nga adda ti maysa a nabiktima ti paputok iti ili ti Banna bayat ti panangselebrar ti paskua ngem saan a nakaipaay ti naan-anay a detalye gapu ta manarimaan paylaeng ti panangur-uray da ti kompleto nga impormasyon mainaig iti daytoy a pasamak.
