LAOAG CITY – Nakigtot ti maysa a photographer iti Wales, United Kingdom idi naammoanna a ti mangiyur-urnos kadagiti kagamitanna no rabii ket maysa a bao.
Segun iti wildlife photographer a ni Rodney Holbrook, nariparna nga adda ti misteryoso a makibibbibiang kadagiti ramitna iti tool shed idi maobserbaranna iti indulinna a birdfood ket naikabil iti daanna a sapatos.
Simmaruno iti daytoy ket nariparna dagiti inbatina iti rabii ket arig maipakpakni.
Kanayon a nakakandado ti tool shed-na isu nga ammona a saan a tao ti agar-aramid daytoy isu a tapno matiliw ti adda iti likudan a makibibbibiang kadagiti ramitna, nag-setup ni Holbrook ti night vision camera ken inbatina daytoy iti tool shed nga agrekrekord a nagpatpatnag iti rabii.
Idi i-review-na ti camera iti kabigatanna, nakigtot unay daytoy a bao ti mangipakpakni kadagiti ramitna.
Iti video nga in-post ni Holbrook, makita a saggaysa a bakbakkatenna dagiti lansa, cable ties ken babassit a tools tapno ikabil iti maysa a tray.
Kabayatanna, naammoan a pinanaganan ni Holbrook ti bao a “Welsh Tidy Mouse.”
