LAOAG CITY – Maysa a baro a world record ti nagun-od ti Japanese musician a ni Keita Hattori kalpasan a pinindotna ti maysa a piano key iti 1,030 a daras iti uneg ti maysa a minuto.
Nabayagen a musikero ni Keita ken dati isunan a nakagun-od ti world record iti kinnapaspasan iti panagtukar ti drums.
Iti kaudian a record attempt idi Disiembre 20, 2024, narigrigaten a karit ti sinangona ti kaalistoan a panagpindot iti maysa a piano key iti uneg ti maysa a minuto.
Saan met daytoy ti umuna a daras a pinadasna ti rekord. Idi 2023, namindua a darasna a nagun-od ti titulo kalpasan a nakairekord ti 892 ken 958 a panagpindot.
Nupay kasta, kalikagumna nga artapan pay ti bukudna a rekord.
Naammoan a kalpasan ti maysa a bulan a panagsanay, nangbukel isuna ti baro nga estratehia.
Nagtugaw isuna ti akinkannawan a paset ti piano ken inusarna ti maysa a ramayna tapno paulit-ulitna a pindoten ti kangatoan a C key agingga a malpas ti minuto nga inkeddeng ti Guinness World Records.
